هر کیمه یوز ورسه درد بی دوا              حضرت عباسه قیلسین التجا

 

بو علمدار شهنشاه وحید                        در گهندن سائل اتمز نا امید

 

بی سبب بو منبع فضل و ادب                 اولمیوب باب الحوائج منتخب

 

فاطمه قیزلارینا امداد ایدوب                  قلب زهرانی اوزیندن شاد ایدوب

 

کربلا ده ایلیوب بو نامدار                       بیر شهامت بیر رشادت آشکار 

 

ویرمیوب دنیا اونون مثلین نشان             شستینه تحسین ایدوب کروبیان

 

فضل عباسی بیری ائتسه رقم                شاخه طوبی گرک اولسون قلم

 

نه فلک الده گرک قرصاس اولا              تا رقم شخصیت عباس اولا

 

آه او گوندن کربلا ده کوفیان                  ائتدیلر پیغمبر اوغلون باغری قان

 

ابن سعدی شاد ایدوب گولدوردوله         شاه دین انصارینی اولدوردولر

 

نوریله ظلات آرا باشلاندی جنگ             ابر غمدن یادی باران تک خدنگ

 

وردی جان بیر عده عطشان حق پرست   لشکر اسلامه یوز وردی شکست

 

اولدی پژمرده شهنشاه انام                     نه قشون قالدی نه تیپ و نه نظام

 

کربلادن چیخدی عرشه شور و شین        سیندی اردوی همایون حسین

 

نه سپه قالدی اوگون نه سرسپاه             بیروزیرجنگ قالدی بیرده شاه

 

شاه مظلومین وزیر و حاجبی                      قارداشی اون یدی منصب صاحبی

 

لشگرین سقاسی صاحب پرچمی                قوت بازو وزیر اعظمی

 

حیدر ثانی جوان بی  قرین                        شیر غضبان زاده ام البنین 

 

صولت شیر خدانون مظهری                      ملجائی، فرماندهی، سرلشگری

 

بیر روایت دور بو سوز چوخ معتبر              ایلسیدی هر کیم عباسه نظر

 

حال حیرتده دیردی بو سوزی                   گورمیوپ مثلین بونون دنیا گوزی

 

قدرت و صولت ده خلقتده مثال                 کُفو عباسی یاراتموب لایزال

 

اوز کمال قدرتین پروردگار                       ایلیوبدور خلقتینده آشکار

 

شاهی یالقیز گوردی اولدی سینه تنگ       گلدی تا تحصیل ایده فرمان جنگ

 

بیر طریق خاصی له تکریم ادوب               شانینه لایق شهه تعظیم ادوب

 

عرض ادوب ای پادشاه ماسوا                   بو کمک سیز جانوه جانیم فدا 

 

گرچه من شیرخدا فرزندیم                     فاطمه ام البنین دلبندیم

 

حیدره دعوا گونونده مظهرم                    واربونا فخریم حسینه نوکرم

 

شیریون یا آچگنن زنجیرینی                  یا الیندن آل بوگون شمشیرینی

 

بوندان آرتوق اولما راضی خوار اولا           بی لیاقت فرض ایدورسن سال یولا

 

من مگر بو دشته بیجا گلموشم                ایتماقا جنگه تماشا گلموشم

 

ایلیم نظاره ظلم دشمنه                         نیلورم بو عمری عار اولسون منه

 

اولمه میش زینب توتوپدور یاسیوی         به هنر فرض ایلوسن عباسیوی

 

نه روادور زنده قالسون نوکرون                        تشنه لب دوغرانسون اما اکبرون

 

نه روا دور ای خدیو رستخیز                  اولسون عباسین الینده تیغ تیز

 

خیمه گاهوندان اوجالسین العطش           تشنه لیقدان ایلسون اطفال غش

 

من باخوم دریا کیمی آخسون فرات         سودیوب یانسیز سوسوزلوقدان بنات 

 

اذن ویر میدان جنگه آت سالوم             عده ی مقتولون قانین آلوم

 

صبریمی آلدی سوسوز قیزلار سسی        خاصه لیلانون اوغول وای ناله سی

 

گر علمدارون اله شمشیر آلا                  قویماز اکبر قاتلی زنده قالا

 

گرچه بو لشکر ده وار چوخ پهلوان          هر بیری دعوا ده بیر شیر ژیان

 

منده اما ای شه یوم نشور                      سن بلورسن واردی نه قدرت نه زور

 

صادر اولسه جنگه فرمان مطاع               دمشجاعت دن وراماز بیر شجاع

 

ایلرم بو لشگری زیر و زبر                      قویمارام قالسون سلامت بیر نفر

 

فتح ونصرت بیرقین ویرام بوگون            قانیله میدانی دولدورام بوگون

 

محضرینده ویرم عالی التزام                            قویمارام قالسون و تیپ و بو نظام

 

عرصه هیجانی قیلام بحر خون               ایلرم هر نه علم وار سرنگون

 

قادرم بو دشتی قاننان دولدورام             بیرقون نهر فرات اوسته ورام

 

قلبینی اشرار شامین داغلیم                 خیمیه یه نهر فراتی باغلیم

 

سیدی وئرسن منه فرمان جنگ                       شامده ورام یزیده پالهنگ

 

شام امیرین ساللام ایله ذلته                  قوللاری باغلی گتورم بیعته 

 

شه وزیر جنگی گوردی خشمناک           غیرتینن بولدی مشرف برهلاک

 

بولدی صاحب قولینه قارداشینی             قوزادی زانوی غمنن باشینی

 

ایتدی فرمایش ابولفضلیم دایان              بودایانماقدا وار عالی امتحان

 

گرچه بو صحرا ده وار چوخ دشمنین       سن ولی کبش کتیبم سن منیم

 

سن بوگون پشت وپناهیم سن منیم         سن علمدار سپاهیم سن منیم

 

سن حسینون قان توکن شمشیری سن    سن نیستان شجاعت شیری سن

 

سن شهید اولسان وفالی یاوریم             بول سینار سنسیز بو چولده لشگریم

 

آیت فتح و ظفردور بو علم                     گوز تکوبدور بیر سنه اهل حرم

 

بو علم وار دشمنوم اولمور جری              بو علم وار زینبون وار معجری

 

بوعلم یاتسا تاپار ال شامیان                  باشیمی ایلر سنان زیب سنان

 

سنسن آل اللهه بو چولده ظهیر             پرچمون یاتسا اولار زینب اسیر

 

تا سلامتدور بدنده اللرون                      اللری باغلانماز آل حیدرون

 

اولدروبلر اوغلومی قوم دنی                   یالقوزام گل قویما قارداشسیز منی

 

ایندی که ناچار اولوبسان گیتماقا            دشمن خونریزیله جنگ ایتماغا

 

ممکن اولسا ای جوان با ادب                  بو سوسوز اطفاله ایله سو طلب

 

اولدی فرمان همایون
امام                      قارداشا عنوان تحصیل مرام

 

داخل اولدی خیمه گاهه بی درنگ          ایلسون آراسته اسباب جنگ

 

جنگه دارا پهلوان بی قرین                    باشه قویدی طاس کلاه آهنین

 

جوشن داود تک عالی زره                     اگنینه گیدی فلک دن گلدی زه

 

باغلادی شیر اوژن روز ستیز                           اوز خم ابروسی تک بیر تیغ تیز

 

ایلدی محکم بلینده خنجرین                 زهره چاک ایتسون هامی دشمنلرین

 

دسته خنجر ده قیلدی استوار                زلف اکبر تک کمند تابدار

 

کتفنه سالدی مدور بیر سپر                   پشت خورشیده سوار اولدی قمر

 

بیر الینده بیر سنان پرشکوه                  بیر الینده پرچم نصرت پژوه

 

بیر ده سالدی چگنینه سو مشکینی       خیردا قیزلار باخدی توکدی اشکینی

 

اولدی طالع خیمه دن چون آفتاب           آل هاشم ماهی پور بو تراب

 

غیظیله اولدی عقاب اوسته سوار              صدر زین اوسته توتوب محکم قرار

 

تا عقابه گوستروب مهمیز تیز                 ایلدی آلتیندا مرکب جست و خیز

 

گورجک عباسی چوشیر خشمگین          نه فلکدن گلدی بانگ آفرین

 

زینب عباسی گوروپ ایتدی نوا               سسلنوب قارداش سنه جانیم فدا

 

قلبیمه بو مطلب آرتیردی انین                کربلاده اولمادی ام البنین

 

اوغلونون جنگین گوریدی آشکار            ایلییدی امهاته افتخار

 

شیریزدان اوغلی چون شیرژیان             لشگر شام اوسته سست ائتدی عنان

 

مرکز میدانه یتدی با شتاب                             نیزه سین وردی یره چون بوتراب

 

صولتندن ایتدی لرزه بحر و بر               حیرته دوشدی قضا و هم قدر

 

سویه دی امر قضا حیدر دی بو               قدرت حق فاتح خیبر دی بو

 

حمله ایلور مرتضادور لشگره                  یوزقویوب تیغ الده فتح خیبره

 

ایتسه بو قهریله اقدام ستیز                  آشکار ایلر قیام رستخیز 

 

ایلین ساعت قضا بیله خطاب                  گوئیا امر قدر وردی جواب

 

بیله بولمه حیدر صفدر دی بو                 حیدره دعوا گونی مظهر دی بو

 

چرخین آلتیندا شجاع النّاس دور           مرتضی اوغلی آدی عباس دور

 

دست پرورد علی دلده الی                              شوریله سسلندی دلدن یا علی

 

غیظ یوزوئردی حسینون شیرینه            ال آپاردی قبضه ی شمشیرینه

 

قبضه ی شمشیر الینده یکسره              ایتدی حمله قلب فوج لشگره

 

یادگار مرتضی الده حسام                      ایتدی ظاهر شورش یوم القیام

 

دشمنین یوز دوندروب هر هنگینه          ووردی اول بیر قلج سرهنگینه

 

الدی فرمانده پوزولدی نظم جنگ           عده یوز قویدی فراره بی درنگ

 

کوفیان سسلندیلر این المفر                  چخدی یردن عرشه بانگ الحذر

 

 پور حیدر بیر آجیقلی شیریدی             پیش روده کوفیان نخجیریدی

 

ایتدی دعوا حیدر کرار تک                    آچدی بوهدی لشکری طومار تک

 

رزمگاهی ایلدی دریای خون                            هاردا بیر پرچم واردی اولدی سرنگون

 

ال هامی الدن اوجا قول دل پسند           تیغی هر بیر تیغی دن بالا بلند

 

هر کیمه باشدان ورار دی تیغ تیز           تنگ مرکب دن اولاردی شعله خیز

 

اولدی عباسین الینده کارزار                  فوق ایدیهم یدالله آشکار 

 

بیربیری اوسته قالاندی کشته لر            کشته لردن اولدی پیدا پشته لر 

 

بیر بیره پیوند کوگدی باش و قول            جسملردن یرده باغلانمیشدی یول

 

یوز گریزه گویدولار اشرار شام               قالدی نه افسر نه بیر فرد نظام

 

قورخودان ابطال ایتوردی اوزلرین           رعبدان یخدی قاچانلار بیربیرین 

 

بعضی قاچماقدا مرامه چاتدیلار              اوزلرین بعضی فراته آتدیلار

 

ایلیه بیر یرده کیم عباس جنگ              پور دستان ایلیه بولمز درنگ

 

نه دوزر بو صولته جانکاهه سام               نه ادر بو جنگه گرشاسب دوام

 

سعد وقاص اوغلی تا ائتدی نظار             گوردی تاب ایتمور قشون ایلور فرار

 

یوز قویوب ابلق ساچانلار کوفیه              دولدی اولده قاچانلار کوفیه

 

آز قالور ایتسون او شیر نامدار                لشگری مور و ملخ تک تار و مار

 

آتشین دل همدم  آه بارده                     یوز قویوبدور خیمه گاه مارده

 

کیمدی بو مارد بلونمز ما یقال                 ایتمسم تقریر اونان شرح حال

 

عمر و عنتر دن قوی بیر نامدار               تالی مرحب شجاع روزگار

 

خلق اولان گونن سماوات و زمین            زور و بازو ده صلابتده یقین  

 

ورمه میشدی کفر ده گیتی نشان           ماردین مثلی هنرلی پهلوان

 

جمعیدی یوزمین او صحرا ده شریر         مارده اما تاپیلماز دی نظیر

 

صبحدن بیر ایله های و هوییدی             کربلا میدانی قانان جوییدی

 

بیر کسی بولمور دی چون هم کارزار       اتمیشیدی خیمه دن باشین کنار

 

ابن سعد اولدی او شومه ملتجی             سویله دی سنسن بو دعوا ده نجی

 

ای اولان بولشگره پشت و پناه               چاره قیل یاتدی علم سیندی سپاه

 

گورموسن ایلور نجه عباس جنگ  لشگر شامه اولوبدور عرصه تنگ

 

تیغی هر بیرپهلوان باشینده دور             برق شمشیری اَیر قاشینده دور

 

سویله دی مارد بونه سوزدی امیر            من کیمی شیری بیلورسن چوخ حقیر

 

مارده بو سوزدی تنزیل مقام                  جنگ عباسه دیورسن ایت قیام

 

ایلورم بو امردن چوخ ننگ وعار              ایلیوم عباسینن من کارزار

 

سالمارام اما سنون امرون یره                 قویمارام عباس آتا جولان وئره

 

اولام ایندی عرصه رزمه روان                 بیر شجاعت ویرم عباسه نشان

 

قلبینی آل علینون داغلارام                   تیغینی آللام قولونی باغلارام

 

ائتدی تا بو سوزلری مارد بیان                خیمه سینن چیخدی چون پیل دمان

 

پیکری غرق سلاح و کارزار                    وه پیکر بیر آتا اولدی سوار

 

معدن کبر و غرور الده سنان                  رزمگاهه ایستدی اولسون روان

 

ابن سعد امر ایتدی قوم کافره                ایلیون تکریم بو سرلشگره

 

قویمیون یالقیز گیده بو صف شکن          مین نفر دوشسون قیاقه تیغ زن

 

ساغ و سولدا پشت سر ده مین نفر         رزمگاهه ایلایون بونان گذر

 

ماردین شانی گرک ایتسون ظهور            گورمسون یالقوز ابوالفضل غیور

 

ابن سعد امریله بیر عده سپاه                ماردیله ایتدی عزم رزمگاه

 

تا یتیشدی رزمگاهه اول دنی                 قیتروب اوز یرلرینه عده نی

 

تا ابولفضلیله دوردی روبرو                     باشلادی کبریله اول گفتگو

 

ایتدی عباسه عتابیله خطاب                   ای جوان سعد اوغلون ائتدون دل کباب

 

سانما بیرنام آور پرزور سن                    بی جهت اوز زوروه مغرورسن

 

گرچه قتال العرب فرزندیسن                 صف شکن مرحب بولن دلبندیسن

 

منده بو لشگرده ارشد افسرم                ماردم بولشگره سرلشگرم

 

اسیته سن دلدن سنی گر سالمیام           بو اولنلر انتقامین آلمیام

 

ال جدل دن چک اشید بو پندیمی         گل منیم اوپ ایندی زانو بندیمی

 

ملحق اول بو لشگر شاماته سن              ایلیوم افسر سنی لشگرده من

 

ایتمیسن گر بو سوزی منن قبول            ایلرم لابد سنی خوار و ملول

 

آتش قهریله قلبون داغلارام                   ای علی اوغلی قولوی باغلارام

 

من سنی بیر ذلته قیلام دچار                 تا دسینلر وار نه قدری روزگار

 

کربلا دشتین ده مارد نیله دی                مرتضی اوغلون نجه خوار ایله دی

 

شیرزاد شیر حق عباس شیر                       حیدر ثانی ابوالفضل دلیر

 

تا ایشیتدی خصم دن بو سوزلری                قهر و غیظیندن قزاردی گوزلری

 

هاشمیه غیرت ایتدی ایله جوش                   ایلدی دریا کیمی جوش و خروش

 

آچدی دل فرزند شیر کردگار           غیظیله سسلندی کی بی ننگ و عار

 

نه جسارت دور بوسنده ای دنی              نه حساب ایلورسن ای کافر منی

 

من او شیرم قهریم ایلر سنگی آب        ایتمرم اصلا سنی روبه حساب

 

وورما بیجا بیر بئله لاف و گزاف              بید تک لرزان دی مندن کوه قاف

 

من علینون شیردل فرزندیم                  مرتضانون صف شکن دلبندیم 

 

شیرزاد شیر حقم شیر گیر                    آتش سوزاندی تیغیم سن حریر

 

تیغ تیز آلسام اله روز مصاف                  صولتیمدن گیزلنر سیمرغ قاف

 

رزمده باغلار دیلین نام آوران                 آچ الون باغلا دیلون ای بی نشان

 

ماردین آلدی بو سوزلر تابینی                راست قیلدی نیزه پرتابینی

 

وئردی جلوه نیزیه تا او پلید                   پنجه سین آتدی ابولفضل رشید

 

نیزه سیندن توتدی اول کین پرورین       نیزه نین آلدی هواده لنگرین

 

باخدی گوردی مارد شوم و شریر           نیزه نین توتدی گلوگاهین او شیر

 

سویلدی اول ددیم ایتمه جدل                ایمدی یوخ یالوارماقا هرگز محل

 

غیظیله سرهنگ هنگ کربلا                  ایتدی فرمایش دایان ای بی حیا

 

بیله فکر ایتمه یتیشدون ایمنه                    یالوارور عباس شیر اوژن سنه

 

آزمایش زورون ایت ای پهلوان                   ساخلا اولسا قدرتون الده سنان

 

نیزه نی اول کافر بی ننگ و عار                   ساخلادی زیر بغلده استوار

 

تا تکان ویردی عزیز بو تراب                       نیزه نی آلدی الیندن چون عقاب

 

ماردین گوستردی عکس مطلبین                سالدی رمحیله ایاخدان مرکبین

 

تنگ مرکبدن وراندا نیزه نی                       سرنگون ایدی یر اوسته دشمنی

 

راکب و مرکب یخلدی نخل وار                  سویله دی احسنت لشگر هر نه وار

 

وئرمدی عباس شیر اوژن امان                ایئتدی حمله مارده الده سنان

 

صیدیله بازی ایدور نه نوعی شیر            ایله رفتار ایدی عباس دلیر

 

بیر رشادت گوستریب اول نامدار            گوئیا روباه اولوب شیره شکار

 

بو لیاقت بو شهام بو کمال                      بو رشادت بو شجاعت بو جمال

 

بو هنر بو زور بیر تک بی معین               ای اوین آباد اولا ام البنین

 

بسلیوبسن نه رشادت لی جوان              اغلووا قربان بو سعدی زمان

 

کاملا ایستوردی مارد خوار اولا                گزدوروردی رزمگه ده صاق صولا

 

آت دوشونده چکدی از بس که فشار       اوز غلامین سسلدی اول نابکار

 

عرصه میدانه گلسه طاویه                      گورمرم عباس الینده هاویه

 

طاویه بیر مرکب مشهوریدی                  جمله صاحب منصب منظوریدی

 

ایلین گون خیمه سین تاراج عدات          مجتبی دن غارت اولموشدی او آت

 

طاویه اوسته سوار اولدی غلام                بلکه مولاسین اده تز شادکام

 

رزمگاهه سوردی فورا مرکبی                 گلدی عباسین حصول مطلبی

 

گوردی تا قارداشنون مرکوبینی              بوشلادی اوزدشمن مغلوبینی

 

بوستان بوترابه سرو ناز                         مرکب اوسته آچدی پر چون شاهباز

 

یوز بقیعه دوندریب با صد محن              گوزده قان یاش سسلدی قارداش حسن

 

یادیمه دوشدی زمان اصعبون                 قویماران بیگانه مینسون مرکبون

 

ایسته دی اول باغری قان شیر ژیان        قولینه فعلیله ورسون امتحان

 

قصد ایدوب غیظیله فورا دشمنی            وردی قلبیندن غلامین نیزه نی

 

سینه سندن آشنا اولجاق سنان             نوک نیزه اولدی کتفیندن عیان

 

ویرمدی اولقدر مهلت جان ویره             مرکب اوستن قالخزوب وردی یره

 

ال ایاقین جمع ایدوبمانند شیر               جست و خیز ایتدی او فجل شیر گیر

 

صدر زین اوستن اوچوب شهبازوار          طاویه اوسته توتوب محکم قرار

 

گوستروب فعلیله پور بو تراب                شیر پشتینده جلوس آفتاب          

 

بیرنمایش وئردی پور مرتضا                   دوست و دشمندن اوجالدی مرحبا 

 

چوخ فراستلیدی از بس که عقاب           گوردی راکب گیتدی خالی دور رکاب

 

چکدی شیحه باخ فرسده جوتده            قاشدی بیر باش خیمه گاه عصمته

 

صیحه سین آلجاق بنات ماهوش             سس سسه بیردن وروبلار العطش

 

خیرداجا قیزلار ورنده سس سسه           چیخدی شون صوتی چرخ اطلسه

 

بیر بیره سویلوب بنات ماهرو                  گلدی سقمیز خیامه گتدی سو

 

ناله المائیله دولدی خیام                        خیمه دن چیخدی سوسوز قیزلار تمام

 

گوردوله نه سو و نه راکب گلور               مرکب عباس بی صاحب گلور

 

هاشمیاتین اوجالدی ناله سی                 چخدی عرشه وا ابوالفضلا سسی

 

فاطمیه قیزلار ایتدی آه زار                    کربلا ده اولدی محشر آشکار

 

گوردی بو  احوالی شاه تشنه کام           چخدی تل اوسته شهنشاه انام

 

گوردی قارداشی رشادت گوسترور          پهلوانلیقدا لیاقت گوسترور

 

قلزم ذخار هیجایه نهنگ                       ایلیوبدور مارده دنیانی تنگ

 

آت دوشونده گزدیرور صاقدان صولا       قویموری بیر ثانیه آرام اولا

 

دور و بر ده کوفیان ایلور نگاه                 قورخودان یکسر اولوبلار پر کاه

 

پهلوانلار تیتروری مانند بید                   حال حیرتده قالوب قوم پلید

 

مارد اتباعندن استمداد ایدور                 سعدین اوغلی لشکره فریاد ایدور

 

باغریمی ایتدی بو غصه چاک چاک         قویمیون فرماندهیم اولسون هلاک

 

ویردی تا سعد اوغلی فرمان هجوم         ایونادی بیردن یریندن قوم شوم

 

قویدولار یوز شیر دلگیر اوستونه            گوئیا روبه گدور شیر اوستونه

 

گوردی عباس رشید صف شکن              شاهبازی قصد ایدوب زاغ و زغن

 

سسلدی تکبیر دلدن شوریله                 مارده بیر نیزه ووردی زوریله

 

آلدی جانین ایلدی امرین تمام                نیزه نی آتدی اله آلدی حسام

 

اوز آتا سی شاه خیبر گیر تک                         ایتدی حمله حمله بیر آجیقلی شیرتک

 

دشمنین قیلدی صفوفین تار و مار          آچدی تا نهر فراته رهگذار

 

تشنه سقا الده تیغ خونفشان        ائتدی نهر علقمه عطف عنان

 

ابن سعدکینه جو و بدشعار                    امر وئرمیشدی اوگون دورت مین سوار

 

راه نهری هرطرفدن حفظ ائده               خیمه ی شاهه مبادا سو گیده

 

گوردی مستحفظ لر عباس دلیر              قصد ایدوب نهر فراتی مثل شیر

 

سسسلنوبلر شعله آذر گلور                   الخدر عباس نام آور گلور

 

دوشدولر خوفه سراسر قاچدیلار            شیره روبه طبع لر یول آچدیلار

 

پرچمین نهر اوسته ووردی شیرجنگ      اولدی فورا داخل دریا نهنگ

 

موج آبی گوردی تا شهلا گوزی               چکدی ناله دولدی چون دریا گوزی

 

سالدی یاده تشنه لب قربانلاری             سویانیندا جان وئرن عطشانلاری

 

نه روادی سویلدی ای نهرآب                 سندن اوتری گوزیاشی توکسون رباب

 

آغلاماقدان اصغرین باتسون سسی         گویلره چخسون ربابین ناله سی

 

قویمادون ای سو سولاردا آبرو                قان اولیدون کاش آدی دنیاده سو

 

سن دگیردون فاطمه مهریه سی             سو دئدی یاندی بنات بی کسی

 

موج وور بوچولده سن دریا کیمی            آخ چوله اشک تر لیلا کیمی

 

اکبر شهزاده دوغرانسون سوسوز           آل حیدر قیزلاری یانسون سوسوز

 

من سنی قانیله اوتدان سیچمرم             آند اولا الله سندن ایچمرم

 

آغلادی توکدی عذاره اشکینی              آچدی چیگنیندن گوری سو مشکینی

 

چشم پر اشک و دل پر تابیله                 مشکینی دولدوردی سقا آبیله

 

سیلدی آب دیده ی پراشکینی              ایله دی چیگنونده محکم سو مشکینی

 

مشگ نه مشگ، عالم امکانه رشک                  فخر ایدور انهار جناته او مشک

 

تار پودی تار عمر کاینات                       عترت طاهایه امید نجات

 

صورت لیلا کیمی پژمرده دور                 جلد مجنون تک اوزی افسرده دور

 

گوزلوری هشتاده دین لیلا اونی              آختارور ذریه زهرا اونی

 

اغلاماقدان آل حیدر خسته دور              عمر امیدی او مشکه بسته دور

 

الده سو جامی سوسوز قیزلار تمام                   گوز تکوبلر بیر او مشکه والسلام

 

ساقس لب تشنه جام الست                             یادگار شیر یزدان شیر مست

 

عترت پیغمبره حصن حصین                  کان غیرت زاده ام البنین

 

عروه الوثقای لقه نور عین                                ملجا زینب علمدار حسین

 

استه دی ایتسون وفاسین آشکار            قویسون عالمده وفادن یادگار

 

ظاهر ایتسون ایله بیر صدق و صفا          خلقه بولدورسون ندور رسم وفا

 

 گوردی تا نهر فراتین موجونی                سوئیله دولدوردی فورا اوجونی

 

سالدی پادشاه ملک عزتی                     سو دیوب قانیاش دین جمعیتی

 

بیرسویا باخدی عزیز بوتراب                  بیرده باخدی دشمنه ائتدی خطاب

 

 من که پور نامدارد حیدرم                     بو کمک سیز پادشاهه نوکرم

 

من بو گون ایله وفا وررو نشان                گورمسون مثلین زمین و آسمان

 

رهروان عشقه گوسترم رموز                  نهر آب اوستونده جان ویرم سوسوز

 

بو الیمده جاوه آب روان                        بو گوزیمده اشک چشم خونفشان

 

گر ایچم یوخ مانعی بومن بوسو               ایچمرم اما واریمدی آبرو

 

بو مروتدور مگر ای قوم کین                            من ایچوم سو تشنه قالسون شاه دین

 

شاهد اولسون مفتدر پروردگار               وار الیمده ایچماقا سو اقتدار

 

ایچمرم رسم  وفادن گیچمرم                          گر حسینیم ایچمسه من ایچمرم

 

باش ویروب باشدان وفامی آتمارام         بو سویا من آبرومی ساتمارام

 

لفظه معنا ایسته دی اعلان ویره              ایچمدی اوجونداکین توکدی یره

 

اول نهنگ بحر عز و احتشام                  چخدی دریادن ولی خشکیده کام

 

بو وفا کیمدن ایدوب آیا بروز                 تشنه دریایه گیروب چخسون سوسوز

 

بیر اولوب عباسدن بو آشکار                  گورمیوب گورمز نظیرین روزگار

 

گوردی ناگه لشگر بی عار و ننگ            چخدی دریادن سوسوز یورقون نهنگ

 

مشک چیگنینده او سردار دژم              بیر الینده تیغ بیر الده علم

 

شیرتک عزم ائتدی نخلستان بویی         تا یاخون سالسون شه خوبان یولی

 

باخدی بو حاله عمر سعد پلید                خیمه گاهه سو آپارسا اول رشید

 

اولسا گر سیراب ایکی قارداش سودان    تا پسا زور و تاب ایکی قارداش سودان

 

لشگریله دولسا دنیا بحر و بر                 جان سلامت قورتارانماز بیر نفر

 

سسلدی بیردن جماعت قویمیون            گوسترون چوخ استقامت قویمیون

 

جهد ائدون سو خیمه گاهه گیتمسون      بوسوسوز سقا مرامه یتمسون

 

      تا بو فرمانی اشیتدی قوم دون         اوینادی دریا کیمی بیردن قشون

 

نیزه و تیغ الده اولدی حمله ور               بو کمک سیز یالقوزا قرخ مین نفر

 

کسدیلر اتباع بو سفیان یولی                 باغلادی اول فرقه عدوان بولی

 

بحر قهر مرتضایه یادگار                        ایتدی حمله الده تیغ جانشکار

 

آند اولا اوز جانینه لولالقضا                    عالم ایجادی ایلردی فنا

 

گله روباه ایچین ده شیر تک                  جنگ ایدوردی میر خیبرگیر تک

 

ایله جنگ ایتدی او پر دل با وفا             نه فلکدن گلدی بانگ مرحبا

 

باش و گول گویده ایله اولدی عیان         گوئیا یپراق توکور باد خزان

 

سسلننده اول دلاور یا علی                    سس سسه وردی ملک لر یا علی

 

گل تماشا ایله ای شیر خدا                    محشر کبری دی دشت کربلا

 

باخ ابولفضلین قلج وورماقینه                 قانیله میدانی دولدورماقینه

 

گورنجه هنگامه محشر قورور                 بیر بولود دور گوئیا قان یاغدرور

 

اوغلوون گور صولا شیرانه سین              ضرب شستین پنجه مردانه سین

 

نه وفا سن ایتموسن پیغمبره                  گوسترور مثلین شه بی لشگره

 

واریری ای قدرت پروردگار                    هر ایکی دنیا ده ایتسین افتخار

 

ملجا عالملره پشت و پناه                      جهد ایدردی تا آچا خرگاهه راه

 

شیری گورجک قورخودان روباه تک       کوفیان تیترردی پر کاه تک

 

برق شمشیرین گورنلر قاچدیلار            بیر بیرین قورخوتدولار یول آچدیلار

 

هریانا یوزقویدی او پیل دمان                 سس سسه وئردی سپاه کوفیان

 

یول ورون گلدی بلای ناگهان                 قابض الارواح ابطال جهان

 

یاتدی بیرقلر پوزولدی انتظام                 ایستدی سعد اوغلو آلسون انتقام

 

سسلدی بس پهلوانلار هاردادور             اوخ آتانلار شه کمانلار هاردادور

 

ای جماعت گورموسوز بو نامدار               لشگری آز قالدی ایتسون تار و مار

 

 آل حیدر اشکینی قان ایلیون                دورت طرفدن تیره باران ایلیون

 

بو کومکسیز پادشاهه سر سپاه                        بو سپاهین ایلدی حالین تباه

 

هر کس الده گر آتا بیر قبضه خاک         توده خاک ایلر عباسی هلاک

 

جراته گلدی قاچان سربازیلر                  عده دن آیرلدی تیر اندازیلر

 

کشور ایمانی ویران ایتدیلر                    سرسپاهی تیره باران ایتدیلر

 

بولدولر یالقوزدی یوخدور بیر کسی        سس سسه ویردی هوا ده اوخ سسی

 

اوخلاری یاغدیردولار باران کیمی            سینه سینده دوزدولر مژگان کیمی

 

اوخ مبادا مشک ده جاگیر اولا                تشنه قیزلار چشمی اشکیله دولا

 

اوخ گلنده هر طرفدن اول جوان             سینه سین پیکاره ایلردی نشان

 

دل گوزی باخدوقجا اصغر اشکینه           حایل ایلردی قولین سو مشکینه

 

خیمیه یتماقه ائتدوقجا شتاب                دشمن بی رحمه ایلیردی خطاب

 

من دیمم اوخ جسمیمه چوخ ویرمیون      ای جماعت مشکیمه اوخ وورمیون

 

تشنه دور ساقی کوثر قیزلاری               سویولی گوزلیر پیمبر قیزلاری

 

فاطمیاته اگر ایتسم سبیل                     بو سویا اولماز برابر سلسبیل

 

ایلرم شرمنده آب کوثری                      قویمارام اولسون سوسوزدان اصغری

 

من ایدن ساعتده عزم کارزار                 غشیدیدی خیمه ده اول شیرخوار

 

عمر اصغر ببسته دور بو مشکیمه            اولم اوح دیسه اگر سو مشکیمه

 

گه ایدوب اتمام حجت لشگره                گه وراردی تیغ قوم کافره

 

جنگیله سرگرمیدی او نامدار                 لشگر ایلیردی قاباقیندان فرار

 

گیزلنوب نخلین دالیندا بیر لعین            غفلتا ائتدی علمداری کمین

 

باخمادی گوزلور سوسوز قیزلار یولین      بیرقلج اندیردی سالدی صاق قولین

 

شیر گوردی سالدیلار ساق پنجه سین    زحمتین یاددان چخاتدی رنجه سین

 

سویلدی بو مشکه قربان اول الیم           آز قالور گلسین دالونجا صول الیم

 

سن وفالیدون بیراز گیتدون قاباخ         گت دالونجا گلماغیم چکمز اوزاق

 

قوت قلب و شجاعت سیر ایله                خارق العاده رشادت سیر ایله

 

صاغ قولوننان قان آتور فواره تک           آسماندور جسمی اوخ سیاره تک

 

ظاهرا قصد ایله دی قدرت وریره            قویمادی شمشیرینی دوشسون یره